Aumentan os pacientes hospitalizados con gripe sen chegar ao nivel de epidemia
Este venres hai 17 persoas ingresadas, pero o Sergas "non pode afirmar con seguridade que a onda epidémica empezase".
As persoas ingresadas co virus da gripe na Comunidade galega aumentaron ata os 58 na quinta semana da tempada actual --que rematou o pasado domingo 10 de decembro--, o que supón 19 máis que hai unha semana, segundo os datos do quinto informe 'Vixilancia da gripe en Galicia' publicados este venres polo Sergas.
Deste xeito, segundo o último informe publicado, desde o principio da tempada de gripe declaráronse 58 ingresos co virus confirmado en hospitais da Comunidade galega, deles o 67% con virus B; dous casos con gripe A e B, e o resto con virus A.
O Servizo Galego de Saúde reflicte no seu novo informe que a día 15 de decembro permanecían hospitalizados 17 pacientes co virus da gripe en Galicia.
A primeira semana declarouse o primeiro falecemento dun paciente con gripe en Galicia na tempada actual, unha muller de 58 anos con factores de risco e non vacinada, que tivo que ser atendida na UCI.
VIXILANCIA MICROBIOLÓXICA
No referido á vixilancia microbiolóxica, o último informe publicado polo Sergas concreta que de 291 mostras nas que se analizaron gripe, 35 foron positivas para o virus da gripe B e 30 para o A.
Isto tradúcese, concreta o Sergas, nunha "difusión xeográfica esporádica" da actividade gripal e engade que a tendencia pasa a ser "crecente". Ademais, precisa que, debido á singularidade da última semana, con dous festivos, "non se pode afirmar con seguridade que a onda epidémica empezase".
Escribe o teu comentario