Condenado un home que ameazou cunha escopeta a un traballador da ITV

O Xulgado de Instrución Número 2 de Ferrol, en funcións de garda, acolleu este mércores un xuízo rápido no que un veciño de Moeche de 75 anos foi condenado a catro meses de cárcere por un delito de ameazas a un operario da ITV de Narón.

O home foi condenado por mostrar este martes unha escopeta de caza a un traballador da empresa Supervisión y Control (SyC) de Narón, tras non superar o seu vehículo, un todoterreo, a Inspección Técnica de Vehículos.

Segundo trasladou unha testemuña do suceso a Europa Press, o incidente produciuse despois de que o vehículo do septuaxenario, un todoterreo, fose rexeitado por segunda vez na inspección periódica, o que motivou que o home ameazase nun primeiro momento ao empregado con "enviarlle uns xitanos para arranxar contas". Acto seguido, sacou do interior do vehículo unha escopeta de caza, cargada cun cartucho, á vez que esgrimía na outra man outro cartucho.

Na sentenza de conformidade incluíuse que a pena de prisión quedará suspendida no caso de que o septuaxenario non delinca nos dous próximos anos.

Ademais, estableceuse unha orde de afastamento de 50 metros, tanto para o establecemento no que se produciu o incidente, a estación de supervisión situada no polígono da Gándara, como para os empregados ameazados, que tamén estará vixente durante 24 meses.

En caso de cumprir todos estes requisitos, o septuaxenario condenado non terá que entrar en prisión.