Sánchez replica a Rajoy: "Falar fálase do tempo, a Constitución actualízase"

Pedro Sánchez insistiu este mércores en que o seu acordo co presidente do Goberno sobre a reforma constitucional non consiste en falar da Carta Magna como "se fala do tempo", senón en abrir unha subcomisión parlamentaria "para empezar a ver cal é o perímetro" da súa actualización.

Así o aclarou ao recoller o premio ao político do ano que lle entregou a revista Cambio 16. "O luns oía a Rajoy dicir que acordara comigo falar da Constitución. Falar fálase do tempo, a Constitución deféndese, aplícase e actualízase", replicoulle o líder do PSOE.

Así que Rajoy "ten dúas opcións", segundo Sánchez. Ou exerce só de presidente do PP e dedícase a defender os seus "intereses electorais" ou actúa como presidente do Goberno e atende as necesidades da cidadanía que, en opinión do líder socialista, pasan por unha reforma da Constitución.

Sánchez mostrouse convencido de que "a unidade de España non se garante por decreto", senón que "se constrúe articulando un proxecto de rexeneración política". "No corazón dese proxecto ten que estar a actualización da nosa norma de convivencia", insiste Sánchez.

Durante a negociación entre o Goberno e o PSOE para aplicar o artigo 155 da Constitución en Cataluña, Rajoy comprometeuse con Sánchez, segundo sostén o líder socialista, a abrir en 2018 unha subcomisión na Comisión Constitucional do Congreso que empezase a traballar sobre a reforma da Carta Magna. Poñeríase en marcha unha vez rematase o seu labor --ten seis meses por diante-- a comisión de estudo xa creada para estudar a modernización do Estado autonómico.

Aínda que Rajoy non desmentiu este compromiso, membros do seu Goberno e dirixentes do PP rebaixaron as expectativas sobre que exista o mínimo consenso necesario entre as forzas políticas para emprender unha reforma da Constitución.

Os socialistas atribúen estas afirmacións á precampaña das eleccións catalás e, sobre todo, á actitude de Ciudadanos --moi crítico cunha reforma constitucional que poida interpretarse como unha concesión aos independentistas-- que empuxa ao PP para botar o freo á reforma constitucional.