Ferreiro estuda denunciar ao PP, que o acusa de adxudicar "a dedo"
Os populares manteñen as súas afirmacións sobre o proxecto do antigo cárcere e anuncian que presentarán un recurso contencioso.
O alcalde da Coruña, Xulio Ferreiro, avanzou que estuda denunciar ao PP por "dar publicidade masiva a mentiras e insidias" contra o goberno local e "difamar" a súa persoa en relación ao proceso de adxudicación da xestión do antigo cárcere.
Mentres, a portavoz do grupo municipal do PP Rosa Gallego reiterou a súa denuncia de que se tratou dunha "adxudicación a dedo" á entidade 'Proxecto Cárcere', á vez que avanzou a presentación dun recurso pola vía do contencioso.
A preguntas dos xornalistas, sobre uns folletos elaborados polo PP e repartidos na cidade sobre esta suposta adxudicación "a dedo", o alcalde reiterou que o goberno local actuou con "transparencia, legalidade e exemplaridade".
"ILEGAL" PARA O PP
Así, defendeu o procedemento administrativo que se abriu para adxudicar a cesión de uso de espazos do antigo cárcere provincial para destinalo a proxectos de dinamización cultural e sociocultural.
Ademais, sinalou que se o PP "ten algo que dicir da adxudicación debería facelo nos xulgados". En resposta a estas declaracións, a portavoz do grupo municipal do PP asegurou que no folleto non se acusa ao goberno local nin ao alcalde de delito".
Con todo, insistiu en que este proxecto "adxudicouse a dedo". "Cando non había nin bases, xa dixen que se ía adxudicar ao Proxecto Cárcere", insistiu sobre os finalmente seleccionados no concurso. Ademais, considerou que se trata dunha resolución "ilegal".
Escribe o teu comentario