Expertos en prevención de incendios acudirán á Cámara durante os próximos meses

As distintas forzas políticas aceptaron a proposta do PPdeG sobre a apertura dunha comisión de estudo sobre a vaga de incendios que invadiu Galicia o pasado mes de outubro. Durante os próximos meses, a Cámara acollerá a expertos en prevención de incendios, co fin de lograr melloras na actual política forestal.

A comisión de expertos centrarase en analizar como mellorar as políticas de prevención e extinción, así como na ordenación forestal, tanto para facer fronte ao lume como para obter un maior rendemento económico, segundo declarou o representante do PPdeG en Hórreo, Pedro Puy.

Cautela na oposición

O PSdeG e En Marea tamén propuxeron de forma conxunta abrir unha comisión de investigación sobre incendios, que ao final cedeu en favor da exposta polo PPdeG. O portavoz socialista, Xoaquín Fernández Leiceaga, reclamou pluralidade no foro e que a súa actividade non se estenda máis aló dos seis meses, para así establecer unhas conclusións firmes antes da campaña de incendios do ano próximo.

O portavoz de En Marea, pola súa banda, expresou a cautela que segue o seu partido ante a comisión proposta polo PPdeG, de quen fará saber ao público se está "a entorpecer" o traballo ao redor da prevención de incendios. "Acabáronse as políticas de cartón pedra", sentenciou.

A líder do BNG, Ana Pontón, apoiou a chegada de expertos á Cámara, que define como "un instrumento válido" e unha "rectificación" do PP con respecto á oposición que mantivo contra este tipo de accións durante 2006, na anterior gran onda de incendios. Advirte ademais que non poderá haber "vetos" nin na elección de comparecentes nin na redacción de conclusións, co fin de que a comisión sexa verdadeiramente útil e non caia en saco roto.