A alerta por seca na zona do Lérez faise efectiva este martes

A extensión da alerta por seca á zona do Lérez faise efectiva este martes, nunha reunión do comité permanente do consello reitor de Augas de Galicia.

Esta decisión, coa que son xa sete os sistemas da demarcación Galicia-Costa en alerta, foi tomada o pasado venres pola mesa técnica da seca.

Mentres, o mércores á primeira hora darase cita a oficina correspondente á conca hidrográfica Miño-Sil, que examinará se continúa coa alerta en toda a demarcación, nun escenario no que "todo apunta" que así será.

INFORMACIÓN E MEDIDAS

En paralelo, Augas xa comezou a enviar citacións aos concellos afectados da área de Pontevedra, aos que reunirá esta semana ou "como moi tarde" o vindeiro luns.

O obxectivo deste encontro, xa celebrado o luns da semana pasada e o venres anterior cos municipios afectados polas outras seis alertas nesta conca, é informar os responsables locais "máis pormenorizadamente" da situación en que se atopa o seu sistema, en primeiro lugar, e "demandar información de carácter técnico" en segundo termo, algo que é preciso, segundo explicou a conselleira, "para poder implementar medidas posteriores".

En canto ás outras seis concas, esa información "está a chegar". De feito, algunha "xa chegou a semana pasada" e outra "está a chegar agora", o que permitirá a Medio Ambiente "propoñer distintas medidas que deberán tomar os alcaldes en relación a poder conseguir un aforro de auga en función da demanda do recurso que poidan ter".

"NON CHEGA"

A choiva dos últimos días "non chega", segundo Mato, quen lamentou que "os próximos días a previsión tamén indica que van ser secos e sen precipitacións destacadas".

"Galicia necesita que chova e que o faga dunha forma continuada e bastante tempo para que poida haber unha recuperación dos niveis tanto dos ríos coma dos encoros", subliñou.