Lobotka, sorprendido polo seu protagonismo no Celta
O eslovaco confía en que "os resultados cheguen pronto", por exemplo fronte ao Athletic o domingo.
Stanislav Lobotka. Foto: RC Celta
A confianza que Unzué deu a Stanislav Lobotka foi unha sorpresa para o xogador eslovaco do Celta. "Non sabía que ía xogar tanto. A verdade é que non esperaba xogar tantos minutos", manifestou este xoves na Madroa.
O xogador céltico espera, por tanto, manter ese protagonismo, por exemplo, no once que saia de inicio contra o Athletic de Bilbao o domingo.
Sobre este encontro, Lobotka falou de que espera un rival "moi forte", pero ao que necesitan superar. "Se seguimos xogando así, os resultados van chegar", augurou, á vez que expresou que "se queremos estar arriba debemos gañar estes partidos".
O DERBI
Máis aló deste domingo, e sen coñecer aínda os horarios das xornadas 13, 14 e 15, o deportivismo e o celtismo xa teñen data e hora para o partido máis esperado da tempada. O Deportivo e o Celta mediranse en Riazor o sábado 23 de decembro, ás 18:30 horas, xusto antes do parón do Nadal.
Escribe o teu comentario