Oliver Laxe teme que a súa película sobre os incendios "non estea á altura"

|

GrabacionincendiooliverlaxeGravación de 'Aquilo que arde'.

O director de cinema de orixe galega Oliver Laxe presentou este xoves en Ourense as primeiras imaxes do seu próximo filme 'Aquilo que arde', unha película sobre os incendios que afronta co "medo de non estar á altura" de Galicia e cuxo guión avanzou que "non seguirá o camiño fácil" de "buscar un culpable".


Así o sinalou con motivo dun encontro co público organizado polo Festival Internacional de Cinema de Ourense (OUFF) e ao que acode por segunda vez, tras a concesión o pasado ano do premio Cidade de Ourense.


Laxe proxectou parte do material gravado este verán durante os 15 días que o equipo de gravación compartiu coa brigada anti incendios de Toén, nunha rodaxe na que o seu equipo empuñou a cámara de 16 milímetros e tamén as mangueiras.


As imaxes mostraron o traballo das brigadas durante varias saídas, especialmente nocturnas, e foron gravadas en incendios coma o de Monterrei que este verán afectou a máis de 300 hectáreas.


Laxe recoñeceu ter "medo" de que o seu filme "non estea á altura do que pide a sociedade" galega, especialmente sensibilizada tras a recente onda de incendios que deixou catro vítimas mortais.


"NON ME SINTO CAPACITADO"


"Non me sinto capacitado para facer unha película que estea á altura de Galicia e o seu sentir", abundou o director que explicou que "como artista" non buscará culpables, "que é un pouco o que a xente desexa".


A película desenvolverase nos Ancares ao longo das catro estacións do ano e contará dúas historias en paralelo. Por unha banda relatará a historia dun veciño que regresa ao pobo tras saír do cárcere acusado de plantar un incendio e as tensións que se xeran cos veciños cando se produce un novo lume.


Ademais, contará a historia de dous brigadistas "primeirizos" na loita contra os incendios. Laxe anunciou que as escenas de acción destes dous actores gravaranse o próximo verán.


Tras explicar a sinopse da película o director incidiu en que 'Aquilo que arde' non será cinema social porque "aínda que sería o máis fácil non é o que lle pide o corpo".


relacionada Oliver Laxe vivirá desde dentro a loita contra incendios para preparar unha película
relacionada Oliver Laxe abre un casting para atopar os protagonistas da súa próxima película

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress