Enésimo caso de "pacientes atrapados" nas Urxencias do CHUS pola falta de persoal

Corredor de Urxencias este martes. Foto: Pacientes CHUS

A Asociación de Pacientes e Usuarios do CHUS denuncia "un novo episodio de colapso do servizo de Urxencias" este martes pola tarde.

A asociación traslada a situación vivida por I.S.L, paciente que chegou ao hospital cunha crise de ansiedade e atopouse con "23 persoas en espera de ingreso ocupando a zona de observación", un espazo que deixaba o resto de pacientes sen ningún sitio dispoñible.

Ante este relato, a afectada presentou a súa queixa ante o "Servizo de Atención ao Doente", ao verse "vítima dun trato que considero inadecuado", "ademais de ter que padecer os síntomas da miña enfermidade".

A asociación de pacientes denuncia que a xerencia "fai caso omiso dos requirimentos de medios humanos que permita a plena dispoñibilidade de camas existentes e que poña fin a esta situación que se mantén de forma indefinida e á marxe de momentos puntuais de demanda".

Así, lamentan que hai "innumerables pacientes que se ven atrapados" nas urxencias "en condicións inaceptables".

Rematan o seu comunicado criticando que no servizo de Urxencias do CHUS, "con pleno coñecemento e consciencia, está a producirse por parte dos responsables sanitarios do complexo hospitalario un quebrantamento sistemático da lei e os dereitos que se recoñecen aos pacientes".