Cruce de mensaxes entre Leiceaga e Villoslada sobre quen favorece máis ao PP

O portavoz parlamentario do PSdeG, Xoaquín Fernández Leiceaga, reivindicou este martes a súa "biografía" de "defensa de posicións políticas progresistas e de esquerdas" sen que se poida atopar nela ningunha "sombra" ou "dúbida" neste sentido, á vez que afeou ao seu compañeiro de escano Juan Díaz Villoslada que busque "debilitalo" antes do Debate sobre o Estado da Autonomía.

Despois de que este candidato ás primarias do PSdeG criticase o pacto selado entre Leiceaga e Gonzalo Caballero para liderar o partido e cargase con dureza contra o portavoz, identificándoo coa "aposta do PP", Leiceaga considerou que este tipo de declaracións son "pouco responsables" en vésperas do debate sobre política xeral. "Isto só favorece ao PP e a Feijóo", evidenciou.

"Cada un é dono da súa biografía, e eu da miña", sentenciou, como unha velada alusión ao paso de Villoslada por unha subdirección xeral na etapa de Manuel Fraga, que denunciou no seu día Gonzalo Caballero.

PACTO CON GONZALO CABALLERO

Sen abandonar as cuestións orgánicas, cuestionado polos xornalistas sobre o seu acordo con Gonzalo Caballero, lembrou que el defendeu que era "absurdo" falar de retiradas antes de iniciarse o proceso, pero que xa desde principios de setembro sempre sinalou que "o pacto era unha das opcións" posibles.

E, para rebater as acusacións de fraude á militancia, subliñou que Pedro Sánchez tamén propuxo unha alianza a Patxi López para vencer a Susana Díaz unha vez superada a fase de avais das primarias do PSOE a nivel federal.

Por último, tras soster que non está formulada a posibilidade de que algún deputado por Pontevedra renuncie para deixar o seu escano a Gonzalo Caballero en caso de gañar as primarias, respondeu que respecta, aínda que non comparte, as críticas do presidente da Deputación da Coruña, Valentín González Formoso, ao seu pacto con Caballero.

OS INTERESES DO PARTIDO

Na mesma liña pronunciouse o alcalde de Monforte, o socialista José Tomé, que criticou o acordo porque "non está xustificado nin responde aos intereses" do partido.

"Veríao ben se algún tivese dificultades para conseguir os avais, pero non estando o tres máis ou menos igualados", sostivo.

Ademais, evocou o resultado das primarias federais para rexeitar o argumento de que unha votación entre dúas favorece que o novo secretario xeral saia elixido cunha ampla porcentaxe de respaldo.

TOURIÑO NON REVELA PREFERENCIAS

O ex presidente da Xunta e ex secretario xeral do PSdeG Emilio Pérez Touriño deu por feito este martes que "o que decidan os militantes" socialistas nas primarias que o seu partido celebrará o vindeiro domingo "estará ben".

Foi a súa breve resposta aos xornalistas antes de participar nun acto de conmemoración dos 50 anos dos estudos de Economía en Galicia, remiso a pronunciarse sobre esa votación.

En concreto, cuestionado acerca de se cre que a organización que el liderou entre 1998 e 2009 quedará en boas mans, mostrouse "seguro" de que iso ocorrerá.

Con todo, do mesmo xeito que o ex presidente socialista Fernando González Laxe, tamén presente no mesmo acto, non quixo profundar neste asunto nin revelar as súas preferencias entre os dous aspirantes a liderar o PSdeG: Gonzalo Caballero e Juan Díaz Villoslada.