A Audiencia Nacional rexeita suspender de forma cautelar a venda do Banco Popular

A Audiencia Nacional rexeitou suspender de forma cautelar a venda do Banco Popular ao Banco Santander tal e como solicitaran varios particulares nos seus recursos presentados contra a resolución do Fondo de Reestruturación Ordenada Bancaria (FROB) que executou a operación.

Así o expón a Sección Quinta da Sala do Contencioso nun auto no que rexeita as peticións de que se anulase o acordo do FROB en tanto este seguiu o acordado pola Xunta Única de Resolución (JUR), organismo europeo do sistema financeiro que valorou con anterioridade a dificultade pola que atravesaba a entidade presidida por Emilio Saracho.

"A paralización pretendida, mesmo se se tratase da mesma venda, deixaría sen efecto a decisión da JUR e mantería unhas circunstancias que os organismos europeos consideraron que fan inviable a entidade e levan un risco para o interese público", reza o auto.

Con todo, a Sala admite que a execución das medidas contidas na venda poden xerar prexuízos "se non de imposible, si de moi difícil reparación" pero estes deberían ser reclamados ante a JUR, que é "a que decidiu a venda" e non dirixirse ao FROB, cuxo papel neste proceso é de "carácter instrumental".