A concesionaria da cafetería tamén espiaba aos empregados do Hospital do Barbanza

O falso teito escondía o circuíto de vixilancia. Foto: CIG

O sindicato CIG denunciou a aparición de cámaras de vídeo ocultas na cafetería de persoal do Hospital do Barbanza.

Trátase do segundo caso deste tipo en concesións da empresa Aramark, tras a aparición doutra cámara oculta no falso teito do cuarto de descanso do persoal do servizo de cafetería do Clínico de Santiago.

Nesta ocasión, a encargada de Aramark foi vista na noite do pasado martes desmantelando un circuíto de videovixilancia do que os traballadores non tiñan constancia, "o mesmo día" que a delegada de persoal solicitou por escrito ao xerente da empresa a certificación dos dispositivos instalados tras ter constancia da aparición das cámaras ocultas en Compostela.

Segundo a CIG, a empresa comunicou en decembro a instalación de cámaras de seguridade no centro de traballo, con tres dispositivos visibles e sen ningún elemento que permita a gravación de audio.

"Se as cámaras son legais, como se explica o proceder da encargada? Ou é que hai tres cámaras que cumpren a normativa e a maiores un sistema oculto do que non se informou?", critica Roberto Alonso, secretario comarcal de CIG-Servizos.

Este mesmo luns, Aramark recoñeceu a instalación dunha cámara oculta na sala de descanso do persoal do CHUS, que atribuíu a un "descadre de caixa". En concreto, explicou que contratou un detective tras detectar esta circunstancia, que foi quen instalou o dispositivo.

Neste sentido, o sindicato pregúntase polas razóns da instalación desta cámara noutro centro sanitario, lamentando que a empresa "non dubide en vulnerar dereitos fundamentais para espiar os seus traballadores".