A Xunta deixa para o outono os traballos de prevención de incendios forestais

Amigos da Terra, Sindicato Labrego Galego, a organización galega de comunidades de montes, a asociación forestal Frouma e a Federación Ecoloxista Galega aseguran que a Xunta non realizou aínda os traballos de prevención de incendios orzados para 2017.

Nun comunicado remitido polo sindicato agrario, estas organizacións denuncian que os labores "comezarán a facerse agora, que empezan as primeiras choivas do outono e vai rematar a tempada de máximo risco de incendios".

"Un ano máis, a Consellería de Medio Rural traballa ao azar, sen calendario, sen obxectivos e cos labores de prevención do ano 2017 sen realizar", critican.

Neste sentido, lembran que "unha das queixas dos profesionais" é "o estado de abandono" da chamada "infraestrutura de prevención".

Consideran que estas "graves carencias" arranxaríanse se o Goberno galego crease mesas de traballo dentro do Consello Forestal. Un órgano, precisamente, cuxa última sesión abandonaron a principios de verán.