Roi Casal leva este domingo a Verín un espectáculo en homenaxe a Neira Vilas
O cantante traballou con el ata o seu falecemento e as letras que forman parte desta xira son do escritor.
Roi Casal, nunha imaxe da xira.
O cantante Roi Casal actuará este domingo ás 21,30 horas na Praza García Barbón de Verín. Este concerto, incluído na súa xira 'Son galego, son cubano', con cancións con letras do escritor Xosé Neira Vilas, amenizará a XXI edición da Feira do Viño da Denominación de Orixe Monterrei.
Segundo informa o Concello de Verín nun comunicado, este é "un dos moitos" espectáculos musicais e teatrais que terán lugar esta semana no municipio con motivo da celebración, unha cita coa gastronomía, as artes e, "por encima de todo", o viño.
O ciclo 'Son galego, son cubano' do artista catoirés foi presentado no Gran Teatro da Habana de Cuba en maio de 2016 con "dous memorables concertos". O espectáculo, que xa foi visto "por máis de 50.000 persoas", conta con letras de Neira Vilas e pon en escena "os mellores músicos de ambos os países".
Roi Casal traballou co escritor ata o seu falecemento en novembro de 2015, polo que a xira está considerada como unha "fermosa homenaxe" a Neira Vilas e á emigración galega en Cuba, onde residiu durante 31 anos da súa vida.
Escribe o teu comentario