Andrea Levy cualifica como "revolucionaria" a reforma laboral do PP

A dirixente popular considérase "revolucionaria".

A vicesecretaria de Estudos e Programas do Partido Popular, Andrea Levy, explicou este xoves que o PP é un partido "revolucionario" en "determinadas cousas que se poden facer", como a reforma laboral. "Cando un aposta por levar a cabo determinadas políticas que cambien a situación, é revolucionario. Darlle a volta ao mercado laboral é revolucionario" engadiu Levy en declaracións a Cadena Ser, recollidas por Europa Press.

En relación coa polémica vivida nas redes sociais pola 'popular" por unha entrevista con Zenda este luns na que admitiu que ler 'La Casa de Bernarda Alba' a fixera "reivindicativa e revolucionaria". Levy precisou que ser revolucionaria é "transgredir as súas propias conviccións". "Cada un pode sentir a revolución no seu propio mundo, como unha xesta, como algo diferente", matizou.

Segundo explicou, fixo esa referencia revolucionaria porque o libro trata sobre como "as mulleres nun mundo dominado por esa moral que as anulaba, tentan gritar liberdade e superar ese mundo de asfixia".

"A min paréceme revolucionario xa que moitas veces polo feito de ser muller póñenme obstáculos en determinados focos. Digo moi forte que ter liberdade de expresión e liberdade para ler o que queira paréceme revolucionario", sinalou a vicesecretaria 'popular'.

"DÉMONOS UNHA MARXE"

Levy pediu un prazo "máis sosegado" para implantar as reformas que pactou con Ciudadanos a cambio de que o partido laranxa apoiase a investidura de Mariano Rajoy e afeoulle a súa "ansiedade".

"Non facía falta, que aquí imos todos con moita ansiedade, que tampouco fai falta cumprir as cousas, ou sexa, que nos demos unha marxe. Algunhas cousas non se tiñan que cumprir en seis meses".

Así se pronunciou Levy preguntada concretamente sobre a limitación de mandatos para o presidente do Goberno e outros cargos públicos --un dos puntos consensuados polos dous partidos no dito pacto de investidura--, despois de que Ciudadanos lle lembrase a Rajoy o seu compromiso con esta limitación tras asegurar que el se atopa "en forma" para volver gañar eleccións.

A dirixente popular, que apuntou que hai peticións que "dan moito rédito político", dixo que este cambio "require unha reforma constitucional". "Cando baixa un a ver a realidade non resulta tan fácil", engade.