O condutor kamikaze cazado en Caldas estará 20 meses sen poder conducir
Non irá ao cárcere por non ter antecedentes.
Edificio do xulgado de Caldas.
O Xulgado de Instrución Número 1 de Caldas de Reis condenou a catro meses de prisión e 20 meses sen carné o condutor kamikaze detido o pasado venres tras conducir varios quilómetros en sentido contrario pola autoestrada AP-9 e dar positivo no control de alcoholemia.
Segundo informaron fontes xudiciais, tras o xuízo rápido celebrado o martes en Caldas, J.L.F.T., de 58 anos e veciño de Outes, foi condenado a catro meses de prisión e 12 sen carné por un delito de condución temeraria. Con todo, a pena de cárcere quedou suspendida ao non ter antecedentes.
Ademais, foi condenado a oito meses máis sen carné e 32 días de traballos a favor da comunidade por condución baixo a influencia de bebidas alcohólicas, segundo engadiron as mesmas fontes xudiciais.
Escribe o teu comentario