Comezan este venres as visitas gratuítas a enclaves arqueolóxicos de Oia

Petróglifos da Cabeciña.

A Asociación Costa dos Castros inicia este venres, día 14, a súa tempada de visitas gratuítas a enclaves arqueolóxicos e de valor histórico de Oia, co fin de dar a coñecer os principais atractivos do patrimonio desta localidade pontevedresa e fomentar o seu turismo cultural.

A organización indicou que a partir do 14 de xullo e ata o 15 de setembro, os xoves e venres ás 12,00 horas realizaranse itinerarios guiados no castro e petróglifos da Cabeciña, e os sábados e domingos ás 12,00 horas farase unha ruta polo barrio do Arrabalde.

Ademais, polas noites --a partir das 22,30 horas-- tamén se realizarán actividades, de forma que os venres faranse visitas guiadas aos petróglifos da Cabeciña e os sábados visitaranse os gravados de Auga dos Cebros. Estas propostas son complementarias, xa que os contidos son distintos.

Estas actividades están organizadas por Costa dos Castros, en colaboración co Concello de Oia e a Deputación de Pontevedra. Todas as visitas son gratuítas e, aínda que para as diúrnas non fai falta inscribirse, as nocturnas teñen prazas limitadas, polo que é necesario reservar no 689.355.713 ou en costadoscastros@gmail.com.