O condutor que arroiou mortalmente un motorista en Vilagarcía carece de carné
O presunto autor dun delito de homicidio imprudente deu positivo en drogas e quitáranlle o carné tras perder todos os puntos.
A Garda Civil detivo como presunto autor dun delito de homicidio imprudente ao veciño de Vilagarcía de 25 anos que, ao redor da medianoite do luns, arroiou un motorista na estrada PO-549, á altura de Bamio, causándolle a morte.
Segundo informaron fontes da investigación, o condutor do automóbil deu positivo en drogas e carecía de permiso de conducir tras perder todos os puntos.
A Garda Civil considera que foi o condutor do automóbil o que provocou o mortal accidente, ao realizar unha manobra irregular para acceder á vía, levándose por diante á motocicleta que pilotaba un mozo de 30 anos, tamén veciño de Vilagarcía. Espérase que nas próximas horas o detido pase a disposición do xulgado que instrúe a causa.
O suceso ocorreu pasadas as 23,20 horas na PO-548, á altura do cruce do Campanario, en Bamio, Vilagarcía de Arousa. Ata a zona desprazáronse efectivos dos Bombeiros do Salnés, Policía Local de Vilagarcía, Protección Civil e unha ambulancia do 061.
Os servizos médicos conseguiron nun primeiro momento reanimar ao piloto da moto, que foi evacuado en estado moi grave ao hospital do Salnés, onde finalmente faleceu.
Escribe o teu comentario