O decreto de etiquetaxe da orixe láctea estará listo tras o verán
O Ministerio de Agricultura traballa noutras accións como profundar no selo de produto lácteo sustentable (PLS), así como unha análise do futuro do sector.
O secretario xeral do Ministerio de Agricultura, Carlos Cabanas, anunciou que o decreto de etiquetaxe da orixe láctea estará lista despois do verán.
Este xoves celebrouse un foro en Santiago --organizado por Unións Agrarias-- para analizar a próxima década do sector lácteo, unha cita á que acudiu Cabanas para informar de que a semana que vén o Ministerio mandará o borrador do decreto á Comisión Europea, que "é a que ten que dar o visto e prace", tras o cal terá un límite de tres meses para poder autorizalo.
"Estou convencido de que á volta do verán teremos o visto e prace por parte da Comisión", afirmou o secretario xeral en declaracións aos medios.
Con este decreto será obrigatorio etiquetar coa orixe España todos os produtos lácteos que se envasen no país. É unha das cuestións establecidas no acordo de 2015 --entre produtores, industria e distribución-- e a súa tramitación acumula meses de atraso. Unha medida que é unha "demanda permanente" do sector, segundo recoñece Cabanas, e que servirá para "clarificar" e "dar valor" a "o que é un produto español".
Ademais, expuxo que o Ministerio traballa noutras accións como profundar no selo de produto lácteo sustentable (PLS), á vez que considera que "é bo momento para facer análise" do sector dado que "existe estabilidade" e "ten futuro por diante".
Neste sentido, avisa de que "todas" as partes da cadea de valor teñen que participar para facer que suba o prezo do leite en orixe --Galicia é a comunidade na que menos se paga ao gandeiro por litro--. Pon como exemplos a procura de produtos con valor engadido, que "demande o consumidor" --posto que no último ano baixou o consumo de leite un 2,2%--, así como "incentivar" a unión de produtores para mellorar a súa "capacidade de negociación".
Escribe o teu comentario