O PP pasará o seu rolete no Senado para evitar emendas nos orzamentos

O Senado recibirá este martes o texto do proxecto de lei de Orzamentos Xerais do Estado para 2017 tras a súa aprobación no Congreso, e repetirá a mesma tramitación que na Cámara Baixa, coa previsión de que o proceso quede finiquitado menos dun mes despois, a última semana de xuño, grazas á cómoda maioría absoluta da que dispón o PP no Senado e á intención do Executivo de que non se introduzan novas emendas aos orzamentos.

O Goberno pretende que o texto non incorpore ningún cambio no Senado, onde pasará a tramitación sen problemas pola ampla maioría que ostenta o PP, co fin de evitar que o proxecto orzamentario teña que ser ratificado posteriormente no Congreso ante a votación tan axustada que se produciría en caso de levarse a cabo.

O Pleno do Congreso aprobou o pasado mércores os primeiros Orzamentos do Goberno en minoría de Mariano Rajoy, tras sumar o apoio de Ciudadanos, PNV, Coalición Canaria, Nueva Canarias -cuxo deputado foi en coalición co PSOE o 26J- e os aliados electorais do PP, UPN e Foro Asturias, sumando un total de 176 deputados que apoiaron a aprobación dos distintos títulos do articulado do proxecto de lei e as contas de todos os ministerios.

Desta forma, os Orzamentos pasan ao Senado cunhas 150 emendas novas e tras o rexeitamento de ao redor de 4.000 iniciativas de PSOE, Unidos Podemos, PDeCAT, ERC e Compromís.

A entrada e publicación do proxecto de Orzamentos no Senado e a designación do Relatorio están programadas para este martes 6 de xuño, segundo o calendario de tramitación publicado pola Cámara Alta.

TRAMITACIÓN

O prazo de presentación de emendas prolóngase ata as 18.00 horas do luns 12 de xuño. Así, o debate en Pleno das propostas de veto xerais e ás seccións terá lugar na sesión plenaria que comezará o martes 13 de xuño, de forma que a reunión do Relatorio e o ditame da Comisión están previstos para a semana do 19 de xuño.

Os senadores terán como prazo para presentar os votos particulares ata as 12.00 horas do venres 23 de xuño, e a tramitación no Pleno da Cámara Alta producirase na sesión plenaria do luns 26 de xuño.

SEN EMENDAS NO SENADO

Desta forma, o proxecto de Lei será debatido e votado a última semana de xuño e, se non se introducen emendas nas contas, quedará aprobado de maneira que non será necesario que volva ao Congreso. Esta é precisamente a intención do Goberno, que o texto non incorpore ningún cambio para evitar que o proxecto orzamentario teña que ser ratificado posteriormente na Cámara Baixa.

Calquera modificación que se introduza no Senado, onde o PP conta cunha cómoda maioría absoluta, debería ser ratificada despois polo Congreso, e volvería repetir a votación tan axustada desta semana, xa que o PP conta cunha maioría de 176 votos, fronte aos 174 votos en contra do proxecto orzamentario.