Silleda celebra este domingo un referendo con pouca polémica

|

Silledaalcaldeconsulta


O municipio pontevedrés de Silleda celebra este domingo unha consulta popular en relación co traslado da Casa Consistorial ás dependencias da Casa da Cultura. O goberno local, dirixido polo socialista Manuel Cuíña, pretende agrupar nunha soa sede as dependencias municipais, agora repartidas en tres lugares diferentes da localidade.


A consulta foi autorizada o pasado 23 de marzo polo Consello de Ministros e exporá a seguinte pregunta: "Está vostede de acordo no traslado da Casa Consistorial --Rúa Trasdeza número 55-- e demais servizos municipais situados noutras dependencias ao edificio actualmente destinado a Casa da Cultura?"


Con resposta permítense dúas opcións: "Si, estou de acordo co traslado" e "Non, estou en contra do traslado". En declaracións a Europa Press, o rexedor de Silleda, Manuel Cuíña, confiou en que a consulta alcance unha "alta participación" nunha decisión que está a ser "moi debatida" polos veciños.


A consulta desenvolverase como unha cita electoral máis. Os 13 colexios de Silleda abren ata as oito da tarde e o Concello confía en ter o resultado das votacións ao redor das nove e media do domingo.


CONFÍA NA VITORIA DO "SI"


Así, segundo manifestou Manuel Cuíña, o ánimo do goberno que dirixe é cumprir unha das súas promesas electorais e agrupar nun só lugar as dependencias municipais, actualmente dispersadas ata en tres puntos da localidade.


Co cambio, a Casa da Cultura, situada no centro de Silleda, pasaría a converterse na sede consistorial, aínda que, de ser aprobado polos veciños, deberán levar a cabo obras de acondicionamento no edificio.


Así as cousas, Cuíña mostrouse confiado en que os veciños apoien o traslado, que dotará de "maior seguridade e accesibilidade" ás dependencias municipais. "Polo que escoito, (os veciños) están maioritariamente a favor", asegurou a Europa Press.


AUTORIZADA POLO CONSELLO DE MINISTROS


O pasado mes de marzo, o Consello de Ministros subliñou que autorizou a consulta ao cumprir todos os requisitos formais e materiais que establece o artigo 71 da Lei de Bases do Réxime Local.


No seu momento, o Goberno estatal sinalou que se cumpriron os requisitos "formais ou de procedemento", así como os "requisitos materiais: asunto de competencia propia municipal, asunto de carácter local, temas de especial relevancia para os intereses dos veciños e asunto que non é relativo á Facenda local".

relacionada Pedro Sánchez comunica a Rajoy a postura do PSOE contra o referendo ilegal
relacionada Rajoy sobre o referendo: "Nin quero, nin o creo, nin se vai producir"

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress