O Cunqueiro informa das operacións aos familiares a través de SMS

O hospital Álvaro Cunqueiro de Vigo empezou a informar os familiares sobre o que pasa dentro do quirófano. Grazas a unha app móbil, o propio persoal que participa na intervención pode enviar ás familiares mensaxes con información para facer a espera máis levadía.

Esta plataforma de comunicación baseada no envío de SMS, explica o Sergas nun comunicado, ten como obxectivo "informar os acompañantes" dos pacientes "sen que teñan que estar fisicamente na sala de espera durante a intervención", así como "mitigar a súa inquietude mentres esperan".

Enmarcada no Plan de Mellora e Escoita Activa que desenvolve a Eoxi de Vigo, esta medida contempla que as mensaxes de texto sexan enviadas desde o propio computador do quirófano mediante a plataforma Avisa_me, polo que a comunicación é "directa e rápida".

O SMS pode ser de dous tipos: un que avisa de que a operación finalizou e outro para informar de que continúa.

A aplicación empezou a usarse en operacións infantís e agora estenderase para todas as especialidades e no futuro, ao Meixoeiro.