O Celta non maquilla en Mendizorroza o seu final de liga errático

O Celta caeu en Mendizorroza ante un Alavés que na primeira metade mostrou unha efectividade absoluta e anotou tres tantos. Tras o descanso, os celestes conseguiron facerse co dominio, que se traduciu nun gol de Aspas e en ocasións sobre a portería de Pacheco. Neste choque debutou en Primeira, con 19 anos, o porteiro canteirán Iván Villar.

Aos cinco minutos, co Celta tratando de apoderarse do coiro, un erro tremendo na saída de balón permitiu que Manu García encarase moi comodamente a Iván Villar e anotase con facilidade. Pésimo comezo do choque para os vigueses.

Pouco despois, o Celta tivo unha oportunidade cunha chilena de Beauvue, que puido parar Pacheco. E aos 17 minutos segundo rete do Alavés e segundo tanto local, nacido dun saque de esquina que rematou de cabeza, só, Feddal á rede.

Aos 36 minutos, contra local, centro á área e remate de Deiverson a porta. Efectividade máxima do Alavés, que non gozaba da posesión, pero anotaba en cada chegada. A primeira metade acabou de maneira accidentada, coa retirada de Marcelo Díaz tras un forte golpe na cara.

Tras o descanso, bo arranque celeste con ocasións e chegadas, en especial un remate de Aspas que rexeitou Pacheco. O canteirán e Sisto tentárono despois sen acerto no monólogo celeste da segunda metade.

A falta de quince minutos, penalti a Sisto tras unha gran xogada persoal. Aspas anotou desde os once metros o seu décimo oitavo gol en Liga, un tanto merecido para un Celta que dominaba o encontro.

FICHA

3-Deportivo Alavés: Pacheco, Vigaray, Alexis, Feddal, Theo, D. Torres, Manu (Llorente, min.74), Sobrino, Toquero (Edgar, min.66), Katai (Romero, min.70) e Deyverson.

1-RC Celta: Iván Villar, Roncaglia (Jonny, min.60), Sergi Gómez, Fontás, Planas, Marcelo Díaz (Tucu Hernández, min.44), Wass, Jozabed, Pione Sisto, Bongonda (Iago Aspas, min,46) e Beauvue.

Goles: 1-0, min.5: Manu; 2-0, min.17: Feddal; 3-0, min.36: Deyverson; 3-1, min.78: Aspas, de penalti.