Un pescador captura unha troita de case tres quilos en augas do río Verdugo

Un pescador habitual nas beiras do Río Verdugo capturou á primeira hora do venres unha troita de case tres quilos en augas da zona de Coveliño.

O pescador que capturou o exemplar foi Álvaro Míguez, natural de Taboadelo, que, segundo destaca o Concello de Ponte Caldelas (Pontevedra), "conseguiu a mellor captura dos seus 40 anos de afección ao deporte da cana e celebrouno cos seus amigos e compañeiros de traballo, que non dubidaron en facerse numerosas fotos coa captura".

Unha desas imaxes compartiuna co alcalde da localidade, Andrés Díaz, así como os concelleiros Lito Muíños e Manolo Barreiro, segundo indicou o Consistorio.

O pescador relatou que acababa de chegar ao río cando tivo sorte. "Levoulle case media hora sacar o peixe do río, nunha batalla que requiriu de moita habilidade e forza física", segundo explicaron as mesmas fontes municipais.

O exemplar pescado acabou en casa do pescador, onde este fin de semana será degustado.