As bases de Podemos deciden se segue adiante a moción de censura

Podemos arrinca este luns a consulta coa que as súas bases decidirá se seguen adiante ou non coa moción de censura que están a promover contra o presidente do Goberno, Mariano Rajoy, e que prevén presentar en torno a terceira semana de maio.

A consulta, á que están chamados a votar os ao redor de 480.000 inscritos do partido, estenderase ao longo de toda a semana, ata o vindeiro luns día 15, e os resultados daranse a coñecer, como é habitual, ao día seguinte.

O partido morado ten por costume deixar en mans das súas bases aquelas cuestións que consideran de especial transcendencia, e así o plasmaron nos seus estatutos. Do mesmo xeito que xa fixeron cos pactos de goberno, coa súa posición nas dúas investiduras do ano pasado, ou coas alianzas con outras forzas, Podemos quere que sexan os seus militantes os que tomen a decisión final sobre a moción de censura que anunciaron a semana pasada.

Tras o probable 'si' das bases á moción, Podemos quere rexistrar a iniciativa canto antes, xa que consideran "urxente" a necesidade de facer fronte á "situación de excepcionalidade democrática" que se xerou por mor dos últimos casos de corrupción que afectan ao PP.

Por iso, a súa idea é presentala esa mesma semana --a terceira de maio--, en torno ao día 18, en vésperas da manifestación que convocaron o sábado 20 na Porta do Sol para promover a moción, e tamén pouco antes das primarias do PSOE, que terán lugar ese domingo 21 e das que sairá o próximo líder dos socialistas.

PROSEGUEN OS CONTACTOS CON PARTIDOS

Con todo, a data aínda non está pechada, xa que a intención da dirección do partido morado é acordala co resto dos seus socios de grupo parlamentario --IU, En Comú Podem e En Marea--, segundo explican a Europa Press fontes do partido morado.

Tamén están a solicitar as propostas das formacións coas que se están reunindo desde esta semana. De momento víronse con Bildu e Compromís, e a semana que vén teñen previsto facelo cos indepedentistas de ERC e PDeCAT, que xa avisaron que esixen aval ao seu referendo.

Non se van reunir, salvo un cambio de parecer de última hora, co PSOE, que rexeitou a súa proposta de moción ao entender que con esta iniciativa, Podemos só pretende facer un "xogo de aparencias", segundo a carta remitida polo presidente da Xestora, Javier Fernández, en resposta a outra de Iglesias na que solicitaba un encontro. De feito, a negativa chegou só minutos despois de que Iglesias presentase a súa iniciativa.

En canto ao candidato, Podemos non desvelou aínda en quen están a pensar, xa que non queren que este dato centre toda a atención da súa iniciativa, sobre todo se finalmente é Iglesias, a quen os seus rivais acusaron en numerosas ocasións de ter demasiado afán de protagonismo.