Gadis lanza por quinto ano a campaña 'Maio Solidario' en favor dos bancos de alimentos

Presentación da 5ª edición da campaña. // Foto: Gadis

A campaña 'Maio Solidario' de Supermercados Gadis arrinca a súa quinta edición consecutiva, co fin de incrementar a doazón de produtos a 11 bancos de alimentos de Galicia e Castela e León. Esta mesma mañá presentouse esta edición, coa presenza de voluntarios de Bancos de Alimentos, persoal dun punto de venda e directivos da compañía: José Luis Fernández Astray, director de Comunicación, e Antonio Cortés Lobato, director de Márketing.

A empresa valora nun comunicado o "éxito obtido por esta acción solidaria no últimas catro edicións", nas que se recolleron un total de 464.000 quilos de alimentos, unha cifra que foi subindo ano a ano ata alcanzar o récord de 172.000 quilos en 2016, dos cales a compañía achegou 42.000.

Gadis agradece aos clientes a súa xenerosidade e desde este martes día 2 hasta o 31 de maio instala puntos de recollida en 186 supermercados de Galicia e Castela e León para que se depositen unicamente alimentos non perecedoiros.

A cadea de supermercados de GADISA, ademais, "sumará unha importante cantidade de alimentos ás achegas realizadas por clientes e traballadores co obxectivo de que os beneficios desta acción solidaria se estendan ao maior número de persoas".

Nesta liña, a empresa defende que elixe a fórmula de colaboración cos bancos de alimentos "porque habitualmente cooperan con numerosas asociacións e organizacións non gobernamentais e son coñecedoras das necesidades de cada colectivo".

As entidades ás que se doarán os produtos son os bancos de alimentos da Coruña, Vigo, Lugo, Ourense, Valladolid, Salamanca, León, Ponferrada, Palencia e Ávila. Ao longo do ano, tal e como informan no seu comunicado, o programa de Responsabilidade Social Corporativa da compañía suma "máis de 1.800 accións, nas que unha porcentaxe considerable son de carácter solidario".