Controlados os tres incendios forestais iniciados esta fin de semana
Entre Folgoso do Courel, Ribadavia e Bande roldan as 180 hectáreas queimadas en menos de 24 horas.
Os incendios forestais iniciados esta fin de semana en Galicia quedaron controlados entre esta madrugada e a primeira hora a mañá deste domingo. Segundo informa a Consellería do Medio Rural, non queda ningún lume activo que supere as 20 hectáreas.
Ás 7 quedou controlado o incendio rexistrado o sábado ás cinco da tarde no concello lugués de Folgoso do Courel, na parroquia de Seoane. As estimacións da Consellería cifran a superficie afectada nunhas 50 hectáreas. Na extinción levan traballado 4 axentes, 11 brigadas, 5 motobombas, 2 pas e 5 helicópteros.
En Ribadavia un lume iniciado a medianoite arrasou unhas 100 hectáreas en poucas horas. Puido ser controlado pouco antes das cinco da madrugada, afectando á parroquia de San Domingos de Fóra.
E tamén está controlado o incendio iniciado ás 10 da noite en Bande, na parroquia de Carpazás. Ata o seu control, ao redor das 9 e media desta mañá, o lume arrasou unhas 28 hectáreas.
Escribe o teu comentario