O sector da limpeza de Lugo anuncia que empeza unha folga indefinida

// cig.gal

Os sindicatos CIG, UGT e Comisións Obreiras confirmaron este martes que o sector da limpeza de Lugo empezará o próximo 18 de abril unha folga indefinida e avanzaron que impugnarán todos os decretos de servizos mínimos que poñan trabas ao dereito á folga das 2.000 traballadoras.

Nunha rolda de prensa no edificio sindical de Lugo, as tres centrais expuxeron que as traballadoras decidiron retomar a convocatoria de folga despois de que a patronal rexeitase a proposta da mediación para resolver a negociación do convenio colectivo.

Con todo, no apartado empresarial, o 70 por cento da mesa, representado por Aspel situouse en contra da proposta, a pesar de que a Asociación Provincial da Limpeza asinou a favor do acordo, que aceptaba tamén a parte sindical.

A representante da federación de servizos de CIG en Lugo, Carmen Antas, recomendou ao goberno local non cometer os mesmos erros que durante a folga do lixo de Urbaser fai tres anos e alertou de que impugnarán e recorrerán calquera decreto que poña trabas á folga.

Ademais, Antas avanzou que hai empresas que pretenden establecer servizos mínimos do cento por cento, como é o caso da adxudicataria da limpeza dos centros deportivos do Concello de Lugo. A sindicalista concedeu que sexa así nos centros sanitarios.

ASPEL EXPÓN UNHA SUBIDA DO 0%

As grandes multinacionais que compoñen Aspel negáronse a asumir un incremento do 0,5 por cento en 2016 a partir de xullo, a pesar de supoñer unha cantidade de 62 euros ao ano por traballadora a tempo completo. Segundo a súa formulación, a subida debía ser de cero euros en 2015 e 2016 e un 0,75 en 2017 e 2018.

Os sindicatos advertiron de que o conflito estará na rúa ata que os salarios das traballadoras da limpeza de Lugo se equiparen aos de Ourense nun prazo de dous anos.

Así mesmo, aproveitaron para cargar contra as grandes multinacionais do sector por bloquear a aprobación do convenio e sinalaron que "faremos o posible para que estas empresas paguen as consecuencias da folga".

A LIMPEZA DO CHUF TAMÉN SAE Á RÚA

Doutra banda, o presidente do comité de empresa da compañía Ferrovial no Complexo Hospitalario Universitario de Ferrol (CHUF), Marcos del Río, que ten encomendada as tarefas de limpeza no centro sanitario, denunciaba este luns que esta sociedade "utilizou a escusa das crises para despedir, non cubrir vacacións e facer contratos en precario, ademais de non cubrir baixas", polo que reclaman melloras laborais.

Segundo denunciou, desde hai uns meses, "desde febreiro, renovou o contrato, cun millón de euros máis con respecto á anterior adxudicación e que agora pretenden seguir con esas mesmas políticas de represión que tan bo resultado lles deron".

Ditas manifestacións realizounas o integrante da CIG durante unha concentración que protagonizaron no mediodía deste luns os traballadores no hall de entrada ao centro sanitario ferrolán. "Agora a crise non pode ser para un só, e se hai máis orzamento, o normal é que se contraten a máis traballadores", segundo apuntou.

Ao mesmo tempo destacou que dun persoal de "125 traballadores no ano 2012" pasaron " a ser agora 105 empregados co mesmo número de metros cadrados" que tiñan.

"Temos traballadoras que se lesionaron polo material tan precario que tivemos que utilizar, como carros rotos, que dexeneraron en accidentes laborais, tendo que utilizar a mesma fregona para limpar varias habitacións, con políticas de represión que tanto sufrimos, pasando xa a crise, pero para eles sós", apuntou Marcos do Río.

"Os donos de Ferrovial convertéronse coa crise nos máis ricos, isto dexenerou en remitir un escrito desde a dirección da compañía no que aseguran que tomarán as decisións oportunas para que comese esas palabras", manifestou no caso particular do presidente do comité de empresa.