O IVE dos espectáculos en directo baixa do 21 ao 10%
A medida inclúese nos Orzamentos deste ano e deixa fóra ao cinema.
Os Orzamentos Xerais do Estado para 2017 que prepara o Goberno contemplan a baixada do IVE cultural dos espectáculos en directo do 21 ao 10 por cento, segundo confirmaron a Europa Press fontes do Ministerio de Educación cultura e Deporte.
O Consello de Ministros verá este venres 31 de marzo o anteproxecto dos PGE que chegarán ao Congreso o vindeiro martes 4 de abril. De momento, o Executivo alcanzou este mércores pola noite un acordo con Cs para que apoie os orzamentos e negocia para conseguir o de PNV e CC.
O Ministro de Educación, Cultura e Deporte, Íñigo Méndez de Vigo, avanzou a pasada semana que mantería o compromiso do Executivo con Cidadáns para rebaixar ao 10% o IVE aos espectáculos en vivo e que a medida iría no proxecto de lei de orzamentos para 2017. A medida non afecta o cinema.
"Nós cumprimos, e en espectáculos públicos en directo imos facer. Así demostramos que o Goberno cumpre e vaino a facer nos Orzamentos Xerais do Estado, o que supón outra boa razón para aprobalos", sinalou nunha entrevista nos Almorzos de TVE recollida por Europa Press.
O ministro xa avanzou en febreiro que o Goberno baixaría o Imposto sobre o Valor Engadido (IVE) dos espectáculos en directo cando España cumprise "a senda do déficit" porque era un compromiso de lexislatura incluído no pacto subscrito con Cidadáns.
Escribe o teu comentario