PP e independentes arrebatan a Alcaldía de Sobrado ao PSOE

|

Alcaldesalientesobrado 1


O PSOE perdeu a Alcaldía de Sobrado (A Coruña) tras materializarse este martes a moción de censura presentada polo PP e Todos por Sobrado e pola que, finalmente, saíu elixida como nova alcaldesa, María Jesús Souto, cuxo grupo municipal conta con dous edís fronte aos tres dos populares e os catro do grupo socialista.


O PP e Todos por Sobrado presentaron a moción de censura neste concello coruñés apelando, entre outras cuestións, ao incumprimento de acordos plenarios. Este é o mesmo argumento que mantiveron nunha sesión plenaria á que asistiron tamén veciños da localidade.


Fronte á denuncia de "intereses ocultos" detrás da moción por parte do ata agora rexedor, o socialista Lisardo Santos, a nova alcaldesa, María Jesús Souto, de Todos por Sobrado, asegurou que o acordo co PP non obedece a "unha cuestión política" vinculando a moción ao día a día da actividade municipal.


OFERTA DE DIÁLOGO


Tamén ofreceu diálogo ao grupo socialista. "Espero que isto sexa un equipo", dixo tras o pleno en declaracións a Europa Press. "Agora somos dous equipos -engadiu sobre a súa formación e sobre o PP- e espero que tamén se integre o grupo socialista", engadiu apelando a promover no concello a colaboración por parte dos distintos grupos.


De novo e, fronte ao argumento do exalcalde para quen se trata de romper coa "vontade democrática, expresada a través das urnas", a nova alcaldesa insistiu en que non había "diálogo" por parte do ata agora alcalde. "Non se facilitaba documentación, nin se cumprían os acordos plenarios", engadiu.


En canto á repartición de competencias, sinalou que esa cuestión aínda non está concretada co PP e que, no seu caso, espera compatibilizar o seu cargo de alcaldesa coa súa actividade profesional. Pola súa banda, o xa portavoz do grupo socialista instou á rexedora a que a primeira reunión que celebre sexa con esta formación.


"Tendinlle a man, pero non sei cando será", dixo sobre este posible encontro. Pola súa parte, Lisardo Santos, ao que arrouparon outros alcaldes e edís como os de Mesía, Bergondo e Betanzos, atribuíu a moción ao obxectivo de quitar o executivo aos socialistas. "Temían que gañásemos as próximas eleccións por maioría", apostilou.

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress