May activará o proceso do Brexit o 29 de marzo

A primeira ministra do Reino Unido, Theresa May, iniciará o 29 de marzo o proceso de negociación para a saída do seu país da Unión Europea coa activación do artigo 50 do Tratado de Lisboa, segundo confirmou o Executivo de Londres.

O representante permanente do Reino Unido ante a Unión Europea, Tim Barrow, notificou este luns á oficina do presidente do Consello Europeo, Donald Tusk, a súa "intención" de invocar o artigo 50 do tratado comunitario "o 29 de marzo". "Este anuncio cumpre o compromiso do Reino Unido de activar o artigo 50 a finais de marzo do 2017", agregou o Goberno británico.

O ministro responsable do Brexit, David Davis, lembrou que o pobo británico adoptou en xuño de 2016 a "decisión histórica" de abandonar a Unión Europea e subliñou que o Goberno está agora "no limiar da negociación máis importante para a este país nunha xeración".

"O Goberno é claro cos seus obxectivos: un acordo que funcione para cada país e rexión do Reino Unido e que, de feito, funcione para toda Europa; unha nova alianza positiva entre o Reino Unido e os nosos amigos e aliados da Unión Europea ", explicou Davis.