A creación de empresas descende un 14% en febreiro en Galicia

A creación de empresas descendeu un 14% en febreiro en Galicia respecto ao mesmo mes do ano anterior, ata quedar nun total de 418, un retroceso menor que a baixada do 16% da media en España, segundo un estudo de Informa D&B.

En febreiro, o comercio e a construción foron os sectores nos que se crearon máis novas empresas na Comunidade galega, con 111 e 67, respectivamente.

Por provincias, as novas empresas distribúense na Coruña (194), Pontevedra (128), Lugo (50) e Ourense (46). Entre xaneiro e febreiro o capital investido en Galicia redúcese un 2% ata algo máis de 100 millóns, dos cales 74 millóns son do mes de febreiro.

Cataluña é a comunidade onde nacen máis empresas no que vai de ano, con 3.567. Por detrás sitúanse Madrid e Andalucía con 3.349 e 2.861 constitucións cada unha. Son as que máis contribúen á baixada xeral con descensos en todas elas: Cataluña resta 680; Andalucía, 346 e Madrid, 262.

En febreiro, unicamente Castela León e Navarra ven crecer o número de novas empresas, un 1% e un 15%, respectivamente. Cataluña, con 1.782, Madrid, con 1.757, e Andalucía, con 1.560, son tamén as que máis acumulan, e de novo a catalá é a autonomía que máis baixa en valor absoluto, 450 constitucións menos que o mesmo mes o ano pasado.