Así foi o espectacular rescate dos oito tripulantes de 'O Busi'
O Helimer 215 encargouse de levar a cabo unha aparatosa manobra de rescate cando o pesqueiro se atopaba envolto en chamas.
Salvamento Marítimo difundiu a través de Twitter un espectacular vídeo no que mostra como levou a cabo o aparatoso rescate dos oito tripulantes do pesqueiro 'O Busi' cando este se atopaba envolto en chamas.
Foi o propio pesqueiro o que alertou a Salvamento Marítimo ás 17,55 horas, cando comunicou que tiña un incendio na sala de máquinas.
Á zona dirixiuse o helicóptero de Salvamento Marítimo Helimer 215 que se atopaba realizando un exercicio nas proximidades da Coruña.
Só 20 minutos máis tarde o Helimer 215 avistaba aos oito tripulantes nunha balsa salvavidas e procedía a rescatalos, manobra que se aprecia no vídeo.
Concretamente foi Pablo Camiño, un dos ocupantes do Helimer 215, o heroe da xornada. Foi el quen realizou a complicada manobra de rescate, que como indican na súa páxina de Twitter require dun gran esforzo físico.
Desde a rede social, Salvamento Marítimo tamén dá as grazas á embarcación Salvamar Shaula por estar pendente do estado do pesqueiro 'O Busi' e recuperar a balsa tras o rescate.
Escribe o teu comentario