Beiras: "Dixen hai moito tempo que o meu ciclo político estaba pechado"

|

Villaresbeiras


O histórico dirixente nacionalista Xosé Manuel Beiras considera que Luís Villares debe ser o portavoz de En Marea, xa sexa dentro dunha portavocía coral ou única. De feito, ve "lóxico" que a portavocía no Parlamento de Galicia e a portavocía do partido instrumental recaian sobre a mesma persoa.


Antes de participar na presentación da Marea de Brión, e acompañado polo propio Luís Villares, o que foi portavoz de AGE no Parlamento fixo fincapé en que En Marea non é só unha "alternativa electoral", senón unha "ferramenta para a emancipación" de Galicia na "nova etapa" que se abriu. "Por tanto, (En Marea) ten que traballar na sociedade", subliñou en declaracións aos medios de comunicación.


"Para ese traballo na sociedade, o lóxico é que estean conxugados na mesma persoa o portavoz do traballo parlamentario e o portavoz do traballo na sociedade. Porque ademais, a portavocía non é unha secretaría xeral: non hai concentración de poder", argumentou Beiras, xusto antes de precisar que o poder está nos órganos colexiados.


Nesta mesma liña, volveu facer fincapé en que a súa "convicción" é que o portavoz de En Marea sexa Luís Villares: "A miña convicción é que o portavoz de En Marea xa é, e convén que o sexa tamén na outra dimensión, Luís Villares", remarcou, en alusión á portavocía do partido instrumental, que aínda está no aire.


Neste sentido, asegurou que En Marea atópase nunha fase na que "convén consolidar a referencia" deste partido instrumental. A este respecto, lembrou que En Marea naceu con "un reto moi inmediato", que foi as eleccións autonómicas do pasado 25S. Para iso, engadiu, elixiuse internamente a un candidato á Presidencia da Xunta, que foi Luís Villares --En Marea conseguiu ser a segunda forza, tralo PPdeG, nestes comicios--.


BEIRAS: "O MEU CICLO POLÍTICO ESTÁ PECHADO"


"É sabido que por virtual unanimidade [...] Luís Villares tivo o referendo das bases", aseverou o histórico político nacionalista, quen asegurou que non ten "vocación" como portavoz ou posible coportavoz: "Dixen hai moito tempo que o meu ciclo político estaba pechado".


E é que, precisou, a pesar de que pode realizar funcións "accesorias e complementarias" no seo de En Marea, "non hai máis capítulos" despois do epílogo, aínda que este último poida ser longo.


Acto seguido, instou ás bases de En Marea a "deixarse de caralladas" e defender a "xente do común", que é "a máis agredida". "Hai que darse conta do traballo que temos que facer, o demais son caralladas", resolveu.


Finalmente, asegurou que apoiará a Villares "mentres faga as cousas ben" e, subliñou, este último "as fai ben sempre".


Pola súa banda, o portavoz parlamentario de En Marea volveu sinalar que o Consello das Mareas está a traballar actualmente na súa "prioridade", que é "a construción dunha alternativa para o país". Con todo, asegurou que "en breve" se decidirá tanto a coordinadora como a portavocía.

relacionada Villares está disposto a repetir como candidato en 2020
relacionada Villares cre que o portavoz do partido terá menos peso público que el
relacionada Villares defende que a "coralidade" de En Marea non lle resta "referencialidade"

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.
Cabecerarecomendadosgal 2
Cabeceraultimahora 2
Cabeceralomasleidogal 1


Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress