​Protestas ante residencias galegas para denunciar a precariedade dos traballadores dos centros

Os sindicatos CSIF, UXT, CIG e CC.OO. convocaron para este xoves unha xornada de mobilizacións nos centros da Consellería de Política Social.

Protestas de UXT e CCOO en Vigo para reclamar máis investimentos en residencias

As protestas terán lugar este xoves a partir das 11 horas en residencias de maiores, centros de menores e centros de atención a persoas con discapacidade de toda Galicia, si ben desde os organismos sindicais organizadores sinalan residencias como a Torrente Ballester da Coruña, As Gándaras en Lugo ou Campolongo en Pontevedra como algúns dos centros de referencia das protestas. Ademais, na residencia ourensá A nosa Señora dos Milagros terá lugar unha rolda de prensa tras as protestas.

Desde os sindicatos denuncian “a negativa da Consellería de recuperar os dereitos que se manteñen recortados do V Convenio Colectivo Único do seu persoal desde o ano 2012”. Nese sentido, sinalan que isto provocou “o empeoramento condiciones laborais impostas coa escusa da crise sanitaria”.

“Os dereitos recortados desde a crise anterior produciron a amortización de cadro persoal e o aumento da carga de traballo. A isto sumámoslle a falta de medios materiais e o alongamento da situación de excepcionalidade nos centros de Politica Social que provocou a crise sanitaria do coronavirus e a falta de vontade negociadora da Consellería”, lamentan os sindicatos.