Localizan o presunto autor de numerosos lumes forestais que prendía cun chisqueiro

Imaxe de arquivo

Efectivos do Seprona da Garda Civil de Ortigueira (A Coruña) procederon a investigar un individuo pola súa presunta implicación en diversos incendios forestais ocorridos na zona desde 2014.

Segundo informou o Instituto Armado, os axentes, tras levar máis de dous anos tentando identificar o autor de pequenos incendios que ocorrían na localidade ortegana, finalmente puideron dar co responsable dos mesmos e o mércores pasado procederon a investigalo.

Esta persoa, segundo apuntan as mesmas fontes, "utilizaría un chisqueiro para iniciar os lumes", que "eran de escasa entidade, dada a proximidade do GES, que rapidamente os extinguía", segundo concretan.

As investigacións practicadas e as dilixencias instruídas foron remitidas ao Xulgado de Instrución de Ortigueira.