As mulleres de Ve-la luz conseguen o seu obxectivo e abandonan a folga de fame

|

Huelgahambremujeressol


As mulleres que levaban a cabo unha folga de fame na Porta do Sol de Madrid desde o pasado día 9 de febreiro para reclamar protección para as vítimas por violencia de xénero anunciaron que abandonan a súa protesta ao considerar cumprido o obxectivo.


Tras 26 días en folga de fame, a folguista e presidenta de 'Ve-la luz', Gloria Vázquez, anunciou á primeira hora da noite que abandonaban a folga de fame para iniciar "outra forma de loita", despois de lograr un compromiso dos partidos políticos para sacar adiante as 25 medidas que consideraban que se debían tratar na subcomisión sobre violencia de xénero impulsada polo Congreso.


Segundo relatou Vázquez nunha abarrotada Porta do Sol, tanto PP como PSOE comprometéronse con esas 25 medidas, mentres que o resto de formacións tamén mostraron "interese" en sumarse ás mesmas. Entre elas, garantíuselles que terán presenza na subcomisión e crearase un grupo de traballo "durante un ano".


"Podemos representarnos e sabemos o que estamos a dicir", sinalou para defender que as vítimas de violencia machista teñan voz na subcomisión do Congreso para articular un pacto de Estado contra a violencia machista. "Non ten sentido un foro sen os afectados e conseguímolo", proclamou.


QUE VIVA A LOITA DAS MULLERES


Case un mes despois e tras ser recibidas no Senado, unha emocionada Gloria Vázquez anunciou que comezarán a comer --"temos moita fame", chanceou-- e emprenderán unha nova forma de "loita" que arrincará este mesmo mércores cos actos reivindicativos con motivo do Día Internacional da Muller.


'Que viva a loita das mulleres' corearon para recibir este anuncio as decenas de persoas congregadas na Porta do Sol para mostrar o seu apoio ás folguistas.


A folga de fame arrincou o pasado día 9 de febreiro por parte de varias mulleres vítimas de violencia machista e membros da asociación 'Ve-la luz' para reclamar un pacto de Estado que protexa as vítimas por violencia de xénero, ás que posteriormente se foron sumando outras mulleres ata alcanzar a decena de folguistas.


Entre os 25 puntos que esixían figuraba que as nais de fillos asasinados sexan recoñecidas como vítimas de violencia machista, así como aos nenos que quedaron orfos de nai como consecuencia deste tipo de violencia. Así mesmo, consideran "imprescindible" un plan de prevención que empezo nos colexios e que se atenda en "todos os aspectos necesarios" ás familias que estean nesta situación.

relacionada Piden a Carmena que "evite" a multa ás mulleres de 'Ve-la luz' acampadas en Sol
relacionada Folga de fame contra o "abandono das familias" vítimas de crimes machistas

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress