Usar menos antibióticos mellora a recuperación e evita resistencias

O programa de optimización do uso de antimicrobianos (PROA) conseguiu reducir o consumo de antibiótico e de días de hospitalización dos pacientes.

Así o relatou o Servizo Galego de Saúde (Sergas) nun comunicado, no que indicou que foi a finais de 2014 cando un grupo de profesionais multidisciplinar (enfermidades infecciosas, microbioloxía e farmacia) da Xerencia Integrada de Ferrol activou este programa.

Os obxectivos da dita iniciativa son os seguintes: mellorar os resultados clínicos dos pacientes con infeccións; minimizar os efectos adversos e colaterais asociados ao emprego destes antimicrobianos, entre eles a xeración de resistencias; e garantir o emprego de tratamentos o máis custo-efectivos posible.

Todo isto sempre con vocación de asistencia e asesoramento ao prescriptor, é dicir, ao profesional sanitario que prescribe os antibióticos á poboación, asegurou o Sergas.

A principal conclusión, desvelou o Servizo Galego de Saúde, é que o seguimento do emprego destes antibióticos reduce os días de tratamento cos mesmos e o tempo de estancia hospitalaria.

Os antimicrobianos --antivirais, antimicóticos, antibacterianos e antimicobacterias-- son fármacos que demostraron, defendeu o Sergas, unha gran eficacia na redución da morbilidade e a mortalidade das enfermidades infecciosas. Con todo, agregou, a súa utilización excesiva pode contribuír á aparición de resistencias microbianas.