Senra denuncia en Europa "a alarmante contaminación" das rías galegas
Sinala que "a simple penalización económica" a España "non serve, xa que é o pobo quen a paga", e insta a un saneamento "efectivo".
A eurodeputada de Alternativa Galega de Esquerda en Europa (AGEe), Lídia Senra, denunciou en Estrasburgo "a situación de alarmante contaminación" de "boa parte" das rías galegas e pediu ás autoridades comunitarias que obriguen a España a tomar medidas.
Segundo un comunicado, a eurodeputada tomou a palabra no pleno da Eurocámara para sinalar que esa contaminación "afecta moi negativamente" tanto á saúde das persoas, como ao medio ambiente e aos postos de traballo en diferentes zonas.
Por iso, tras sinalar que "a simple penalización económica" a España "non serve, xa que é o pobo quen a paga", Senra esixiu que se "obrigue" a facer o saneamento "de forma efectiva".
É máis, esixiu "todas as medidas que sexan precisas para atallar esta situación" e "acometer dunha vez por todas" o saneamento e a rexeneración das rías galegas.
Escribe o teu comentario