O MAC abre unha nova convocatoria para cubrir catro residencias artísticas

O Museo de Arte Contemporánea Gas Natural Fenosa (MAC) abriu unha nova convocatoria para cubrir catro residencias artísticas -dúas internacionais e dúas locais-, que se desenvolverán entre o 2 de maio e o 30 de xuño, segundo informa.

Nun comunicado, explica que con este programa busca "incentivar a investigación e a produción artística, facilitar a produción artística local, contribuír á promoción dos creadores e promover a mobilidade internacional e intercambio de artistas e outros profesionais da cultura".

Cada unha das residencias ofrece aos beneficiarios, ademais dun espazo de traballo nas instalacións do museo, un apoio total de 3.000 euros en concepto de honorarios e ata 400 euros destinados a produción de obra.

As residencias están dirixidas a artistas de calquera disciplina e profesionais da cultura menores de 45 anos que desexen desenvolver un proxecto de investigación artística na sede do MAC na Coruña.

Ás residencias locais poderán presentarse artistas residentes en Galicia e ás internacionais artistas de calquera nacionalidade non residentes en Galicia.