Dous falecidos ao caer co coche ao río en Tordoia

Os dous falecidos no accidente mortal rexistrado na tarde do xoves ao precipitarse un vehículo ao Río Lengüelle no municipio coruñés de Tordoia son o condutor e o acompañante do turismo sinistrado, dous homes de 26 e 31 anos.

Segundo informaron os Bombeiros de Ordes e o 112 Galicia, o sinistro tivo lugar sobre as 17,15 horas do xoves na estrada que une Ordes e Portomouro, no punto quilométrico 4,5.

Os bombeiros relataron que o vehículo saiu da vía á altura da ponte da estrada DP-5903 que pasa por encima do Lengüelle na parroquia de Numide.

O turismo, un Peugeot 308, precipitouse ao río desde a ponte, aproximadamente dunha altura de 8,9 metros desde a estrada ata impactar coa auga, segundo concretaron os bombeiros.

En concreto, os bombeiros desprazados relataron que desde a ponte se intuía onde podía estar o vehículo mergullado e, unha vez localizado, un dos bombeiros tratou de aproximarse ao coche para comprobar o estado do habitáculo onde ían dúas persoas, o condutor e o seu acompañante.

Os efectivos de emerxencias procederon a retirar os dous corpos pola parte traseira do vehículo. Coa axuda da Policía Local de Ordes, ademais, enganchouse un cabo a un camión de bombeiros para achegalo á beira do río.

LEVANTAMENTO DOS CORPOS

Foron mergulladores da Garda Civil (GEAS) os que se mergullaron e comprobaron a presenza de dúas vítimas mortais no interior do vehículo accidentado. Tras recuperar os corpos esperouse a chegada do forense para certificar o falecemento dos dous mozos, confirmada previamente polo médico do PAC da zona mobilizado xunto a dúas ambulancias asistenciais do 061, M.L.C., de 31 anos, e J.M.L.B., de 26 anos.

Debido a este sinistro instrúense dilixencias por parte do Equipo de Atestados da Coruña para tratar de determinar as causas do accidente e o xulgado competente o de Ordes.