Máis tarifa plana e 32 semanas de permiso de maternidade para os autónomos galegos

A Xunta presentou este xoves un plan de incentivos para os autónomos, que en próximos días se perfilará con estes traballadores, no que se inclúen propostas como a ampliación durante outros 12 meses da tarifa plana e a elevación a 32 semanas do seu permiso de maternidade.

En rolda de prensa despois do Consello da Xunta, o presidente, Alberto Núñez Feijóo, avanzou un investimento de 160 millóns de euros en toda a lexislatura para incentivar e axudar aos autónomos, consciente de que "son a base do sistema produtivo" e de que "boa parte do peso da crise e a recesión caeu sobre eles e as súas familias".

No seu obxectivo está que Galicia "sexa o territorio onde máis axudas teñen para chegar a fin de mes e onde máis incentivos teñen para consolidar os seus proxectos laborais", así como que esta sexa a comunidade onde "é máis barato" ser autónomo. É por iso que este plan estará dotado de 50 millóns de euros máis que o do anterior mandato e prevé apoiar a uns 10.000 autónomos ao ano.

As medidas enfocadas a un colectivo "numerosísimo" en Galicia, ata o punto de que "un de cada catro afiliados en Galicia é autónomo", céntranse tanto no seu nacemento como no desenvolvemento do seu proxecto, nas súas facilidades para conciliar a vida familiar e laboral e na substitución xeracional no seu negocio.

DETALLE DE PROPOSTAS

Así, a Xunta levará á 'mesa do autónomo' a proposta de que a tarifa plana de 50 euros ao mes o primeiros seis meses sexa financiada polas arcas galegas durante outros 12 adicionais, que as axudas de 2.000 euros para o establecemento dos menores de 30 anos se duplique e que os incentivos á contratación aumenten 1.000 euros en cada tramo.

De igual modo, propoñerá unha iniciativa "nova" pola que se dedican 3.000 euros a autónomos que "levan tempo" (42 meses) e que están a pasar "unha situación delicada" (unha facturación inferior a 30.000 euros) para que "reorienten" o seu negocio ou executen "algún investimento".

Para facilitar a conciliación familiar, a Xunta dará "un paso máis" que o Estado, ofrecendo aos traballadores autónomos outras 16 semanas adicionais de permiso nas que tamén se financiará o seu substituto --para o que tamén serán compatibles os incentivos de contratación--.

En canto ao substitución xeracional, o Goberno galego ofrece á totalidade dos autónomos o plan xa implantado para o comercio; á vez que propón destinar 3,5 millóns de euros a formación e abrir unha oficina telemática centrada no autónomo, desde a cal poder axudar cos trámites e ofrecer asesoramento.

DISCRIMINACIÓN POSITIVA

Adicionalmente, Feijóo deu conta de que todas as contías citadas incrementaranse nun 25 por cento no caso de que os autónomos en cuestión estean situados no rural e de que sexan mulleres, discapacitados ou membros dunha familia con todos os seus integrantes en paro.

Así mesmo, o presidente apuntou que as axudas para o establecemento como autónomo e para fomentar a contratación indefinida póñense a funcionar "de forma inmediata" cunha dotación de 20 millóns de euros.