Cuarto día de operativo para reparar as liñas eléctricas danadas

Máis de 1.800 clientes permanecían á primeira hora deste luns sen subministración eléctrica polos danos no tendido ocasionados pola cadea de temporais que afectou esta fin de semana a Galicia. Segundo confirmaron a Europa Press fontes de Unión Fenosa Distribución, á primeira hora continuaban sen subministración 1.815 clientes das provincias da Coruña, Lugo e Pontevedra.

En concreto, na Coruña son 903 os clientes que aínda permanecían coa subministración cortada polas incidencias do temporal. Entre os municipios máis afectados están Vedra e Arzúa, aínda que se producen cortes puntuais noutras áreas.

Así mesmo, tampouco tiñan servizo 267 clientes de Pontevedra, especialmente na área de Agolada e Forcarei, nin 645 de Lugo, unha situación que é especialmente relevante en Castroverde e Monforte.

Operarios de Fenosa continúan este luns os labores de reparación das liñas para restablecer a subministración eléctrica, un operativo que comezou o venres tralo paso do primeiro temporal que afectou a Galicia.

Ademais, Unión Fenosa Distribución puxo a disposición dos usuarios o teléfono gratuíto de atención ao cliente 900 111 999, onde poden solicitar información ou presentar unha reclamación polo corte de subministración que sufriron. Os clientes tamén poden acudir a calquera oficina de atención ao cliente da compañía.

EXPEDIENTE INFORMATIVO

A Xunta está avaliando a situación polos cortes no subministro eléctrico dos últimos días, para o que abrirá un expediente informativo ás compañías distribuidoras co obxecto de confirmar que os protocolos de traballo seguidos foron os axeitados.

O conselleiro de Economía, Emprego e Industria, Francisco Conde, salientou hoxe que seguindo o procedemento habitual "é necesario garantir que as actuacións que se realizaron este fin de semana por parte das compañías eléctricas foron as correctas". Conde quixo agradecer especialmente o esforzo dos equipos que traballaron durante estes días, "sen incidencias a pesar das duras condicións meteorolóxicas", para restituír o servizo en fogares e empresas galegas.