Un investigador galego busca financiamento para o seu proxecto de rexeneración tras lesións medulares

O investigador do Departamento de Bioloxía Funcional da Universidade de Santiago (USC) Antón Barreiro lanzou unha campaña no portal 'Precipita' da FECYT para conseguir financiamento para o proxecto 'Procura de fármacos para a rexeneración axonal tras unha lesión medular'.

Segundo informou a USC, tratan así de buscar unha solución para as 35.000 persoas que se calcula que existen en España con esta doenza, causada a maior parte das veces por accidentes de tráfico. Ademais, segundo explica, produce "un dano irreparable para o que non hai un tratamento que facilite a súa recuperación funcional".

Unha das principais razóns desa falta de recuperación en humanos é que os axóns --prolongacións das neuronas que transmiten impulsos nerviosos-- de neuronas cerebrais que conectan a medula espinal non son capaces de rexenerarse despois da lesión e así volver conectar coas súas neuronas diana.

O equipo que codirixen Antón Barreiro e María Celina Rodicio traballa con modelos de lesión medular en peixes, entre eles o peixe cebra, un animal do que se poden obter centos de larvas cada día en laboratorio. "Facilitando así a proba dunha gran cantidade de fármacos", segundo indican, e que por ser transparente "permite ver con máis facilidade se a neurona de estudo rexenerou ou non os seus axóns tras a lesión e despois do tratamento cun fármaco determinado", segundo explican.

"Se co noso proxecto conseguimos atopar un fármaco que promova a rexeneración axonal no peixe cebra, no futuro tentaremos trasladar estes resultados á recuperación dos pacientes con dano medular", explicou Barreiro.

OBXECTIVO

Para iso, marcaron un obxectivo mínimo de financiamento de 2.000 euros, cos que comprarían os anticorpos necesarios para visualizar a neurona de estudo e unha libraría de 90 fármacos para validar o seu modelo.

De alcanzar o "nivel óptimo" --10.000 euros-- esa librería sería de 1.230 fármacos, "o que aumentaría notablemente as nosas posibilidades", segundo subliñaron.