Rexeitamento internacional ao veto migratorio de Trump

A comunidade internacional acolle con rexeitamento a orde ditada polo presidente dos Estados Unidos, Donald Trump que prohibe, entre outras restricións, a entrada ao país dos cidadáns de sete países musulmáns en nome da loita contra o terrorismo.

Así mesmo, unha xuíz federal de Nova York emitiu un adiamento de emerxencia que temporalmente bloquea a orde executiva pola cal o Goberno dos Estados Unidos impediu a entrada ao país a nacionais de sete países musulmáns.

En virtude deste adiamento, as persoas que aterrasen en aeroportos estadounidenses cun visado válido poderán entrar, temporalmente, ao país.

ALEMAÑA MANIFÉSTASE EN CONTRA

"A chanceler está convencida que a loita decidida contra o terrorismo non xustifica poñer baixo sospeita xeneralizada a persoas dunha confesión ou cun pasado específico", declarou o portavoz de Merkel, Steffen Seibert, ao diario alemán 'Der Spiegel'.

O Goberno federal "procederá agora a examinar as consecuencias que comportará para os cidadáns alemáns con dobre nacionalidade", segundo Seibert, quen declarou que Alemaña representará "os seus intereses, se fai falta, fronte a fronte cos nosos socios norteamericanos".

O portavoz apuntou ademais que a decisión de Trump contraven o dereito internacional humanitario en canto ás prohibicións de entrada a refuxiados. "A acollida de refuxiados por motivos humanitarios está reflectida nas convencións de Xenebra e todos os países asinantes comprométense a isto", lembra.

A orde executiva impón unha moratoria de 90 días á entrada de cidadáns do Irán, Iraq, Siria, Iemen, Sudán e Libia, suspende indefinidamente a admisión de refuxiados sirios e paraliza o Programa de Admisión de Refuxiados. Ademais, fixa en 50.000 o máximo de refuxiados que acollerá o país en 2017, menos da metade dos 117.000 acollidos o ano anterior.

REINO UNIDO

A primeira ministra británica, Theresa May, sinalou que o Reino Unido non está de acordo "co tipo de enfoque" migratorio do presidente estadounidense. "Non estamos de acordo con este tipo de enfoque e non é o que nós imos tomar. Estamos a estudar estas ordes executivas para observar o seu significado e os efectos legais, e en particular coñecer as consecuencias para os nacionais británicos", engadiu.

O Goberno iraniano, pola súa banda, anunciou que permitirá a entrada ao país aos estadounidenses con visado de entrada como xesto de boa vontade. "A diferenza dos Estados Unidos, a nosa decisión non ten carácter retroactivo. Quen teña un visado válido recibirá unha cálida benvida", fixo saber o ministro de Exteriores de Irán, Mohammad Javad Zarif, na súa conta de Twitter.