O PSOE denuncia "obstrucionismo" do Executivo de Oza-Cesuras desde a fusión
Os socialistas tiveron que recorrer á Xustiza e ao Valedor para acceder a actas e información municipal.
Os socialistas de Oza-Cesuras (A Coruña) rexistraron na Subdelegación do Goberno, na Coruña, un escrito no que instan o Goberno municipal da localidade a facilitarlles o acceso ás actas e acordos da Xuntas de Goberno.
Ademais, informan ao Ministerio de Facenda e Función Pública dos "reiterados e deliberados incumprimentos legais" que, neste sentido, está a realizar o executivo do popular Pablo González Cacheiro, xa que a lei estipula, subliñaron, que deben estar a disposición de todos os membros da corporación nun prazo máximo de 10 días.
A este respecto, os socialistas indicaron, a través dun comunicado, que "non é a primeira vez" que se ven obrigados a recorrer a instancias superiores da administración para "reclamar dereitos básicos" recolleitos na Lei de Bases de Réxime Local ou no Regulamento de Organización e Funcionamento das Entidades Locais (ROF), e "imprescindibles" para que realicen o seu labor de "control e fiscalización" do Executivo municipal.
Desde que a fusión entre os dous municipios tivo lugar, o PSOE local tivo que recorrer á Xustiza para acceder á información do rexistro, o que supón, indicou, "un desembolso de 700 euros ao Concello en costas xudiciais".
Ademais, denunciou, tamén tivo que recorrer ao Valedor do Pobo para poder acceder á documentación oficial das reunións do executivo local, nas que se aproban a práctica totalidade dos asuntos que afectan ao día a día dos veciños do Concello.
Por todo iso, a portavoz do PSdeG-PSOE en Oza-Cesuras, Pilar Pedreira, criticou "a falta total de transparencia" do Goberno de González Cacheiro e o seu "permanente actitude obstrucionista", propia, opinou, de quen "ten algo que ocultar".
Escribe o teu comentario