O grupo de En Marea reabre o debate sobre a despenalización da eutanasia

O Grupo Confederal Unidos Podemos-En Comú-En Marea rexistrou este mércores no Congreso dos Deputados unha proposición de lei para legalizar a eutanasia e garantir a súa práctica en todo o Estado a aquelas persoas que a soliciten. Do mesmo xeito, o texto recolle unha modificación no Código penal para que os profesionais que presten este servizo non sexan penalizados.

O texto presentado indica que poderán solicitar este servizo os maiores de 18 anos ou menores emancipados que padezan unha enfermidade terminal "sen esperanza" ou dores físicas e psíquicas "intolerables" para o paciente. Segundo explicou a deputada de EU, Eva García Sempere, serán os médicos ou psicólogos os que realicen un informe do paciente para aprobar ou denegar a súa solicitude.

A demanda de eutanasia deberá facerse por escrito, nun documento asinado polo paciente en presenza do médico responsable, repetíndose de maneira xeral en, polo menos, dúas ocasións cunha separación de 15 días. Se o médico responsable considera que a morte da persoa ou a perda da súa capacidade para prestar consentimento informado son inminentes, aceptarase un período menor ás dúas semanas.

A persoa demandante de eutanasia poderá revogar a súa solicitude en calquera momento. Tanto o documento de petición como da posible revogación serán achegados á historia clínica do paciente. Con todo, a causa da morte, para todos os efectos, será por causas naturais.

OBRIGACIÓNS DOS PROFESIONAIS

García Sempere lembrou que, coa actual normativa, penalízase aos médicos que teñan calquera relación no proceso dunha morte asistida, por iso, nesta lei esíxese que os profesionais teñan a obrigación de garantir o acceso universal á eutanasia.

A deputada sinalou que todo profesional ten dereito de obxectar, pero desde os servizos sanitarios públicos débese garantir o dereito do paciente para poder solicitar este servizo se a avaliación é positiva. Por iso, García Sempere apuntou que no caso de que un enfermo estea a cargo dun médico obxector, este deberá ofrecer os servizos doutro equipo médico que non o sexa.

Do mesmo xeito, desde Unidos Podemos consideran "fundamental" que se modifique o Código penal para que a participación dos sanitarios neste servizo non sexa punible.

TRASLADO ÁS COMUNIDADES AUTÓNOMAS

A formación morada tamén sinalou a importancia de trasladar esta normativa ás comunidades autónomas, que teñen competencias en materia sanitaria. A deputada de En Comú Podem Marta Sibina destacou que existen autonomías, "con Andalucía á cabeza", que desenvolveron leis específicas sobre esta materia.

Así, a lei empraza á creación de dúas comisións, unha autonómica e outra estatal. A primeira será un órgano consultivo e de asesoramento para as consellerías e deberá realizar un informe anual para levar un control sobre o cumprimento da norma na autonomías. Na segunda, recolleranse os documentos anuais de todas as rexións e servirá para o estudo do que está a ocorrer nesta materia a nivel país.

García Sempere sinalou que agora, unha vez presentada esta lei, iniciaranse os contactos co resto de formacións representadas na Cámara Baixa para obter apoios para que se poida tramitar e aprobar.

Neste sentido, Sibina, destacou que a sociedade estaba a esperar unha norma como esta e defendeu que "unha ampla maioría apoia" a eutanasia. Neste sentido, citou unha enquisa do CIS de 2011, na que, segundo apuntou Sibina, un 77 por cento da poboación española apoia a eutanasia.