Podemos Galicia dobra a aposta para conquistar os concellos

Coa vista posta nas eleccións municipais de 2019, Podemos acaba de facer unha "aposta firme por reforzar a estrutura do partido en Galicia". A proposta do Consello de Coordinación galego, o Consello Cidadán de Podemos deu o seu visto e prace a duplicar as dotacións do orzamento na comunidade. Isto permitirá "dar un impulso importante á implantación territorial", pois trátase da primeira "partida específica" coa que a formación poderá facer achegas económicas ás súas estruturas municipais.

E é que polo feito de ir ás autonómicas nunha candidatura conxunta con En Marea, non dispón de financiamento propio "a diferenza doutras agrupacións territoriais da formación morada". "Os excelentes resultados electorais conseguidos a pesar das dificultades xurdidas na conformación do espazo foron un factor de peso na toma desta decisión", afirman nun comunicado, por iso entenden que "unha das pedras angulares para o futuro pasa por afondar na implantación territorial de Podemos en Galicia".

REUNIÓN CON SECRETARIOS MUNICIPAIS

Aínda que está por decidir se o partido morado concorrerá en solitario ou con candidaturas de confluencia. Esa estratexia poderase debater na próxima Asemblea Estatal Cidadá de Vistalegre II, pero antes, esta tarde, o secretario de organización de Podemos Galicia, Juan Merlo, reúnese con secretarios municipais do partido.

O obxectivo da reunión é "poñer en común unha estratexia e folla de ruta para o ano en curso" e ir armando a maquinaria electoral para os comicios de dentro de dous anos. Tamén debaterán sobre o próximo conclave e propostas para "afondar nunha estrutura máis descentralizada e territorializada".