CESM: A solución para o SERGAS é máis e mellores contratos, non un plus para os médicos que amplíen xornada

Este sindicato non rexeita de fronte o plan da Xunta, pero cuestiona o seu impacto real, argumentando que a maioría dos galenos está exhausto, polo que non se apuntará.

CESM entende que o problema de persoal do SERGAS liquídase con contratos que eviten que os mozos sanitarios acaben fichando pola sanidade privada ou emigrando, como sucede agora.

Asegura que o persoal "está esgotado" e teme que "a maioría dos facultativos non acepte" a ampliación de xornada  

A Confederación Estatal de Sindicatos Médicos en Galicia (CESM) considera que a medida anunciada recentemente pola Xunta para pagar un plus aos facultativos de Atención Primaria que absorban cotas doutros compañeiros por vacacións, baixas ou libranzas coa ampliación da súa xornada "non é unha solución", porque "un médico non pode atender a 100 pacientes ao día".

Así o trasladou nun comunicado de prensa, no que este sindicato médico valora a medida, pero vea "claramente insuficiente", porque "en realidade supón unha subida de 13 euros respecto ao exiguo plus que xa tiñan quen dobraba quenda".
 

CANTOS SE APUNTARÁN?
Por iso, teme "que a maioría dos profesionais non aceptarán esta proposta porque, entre outras razóns, están esgotados, e trátase dunha medida que supoñerá un gran aforro para a Xunta porque o que fai realmente é deixar de cubrir diversos permisos dos facultativos con máis persoal".

Ademais do "cansazo físico e psicolóxico que veñen soportando desde o inicio da pandemia", CESM explica que esta prolongación de xornada "supón un esforzo tremendo e unha asunción de responsabilidade enorme", xa que, apostila, "esa ampliación de xornada de traballo, ademais de atender a axenda dos seus compañeiros tamén terán que resolver as situacións de urxencias que se presenten".

A central sindical entende que con este plus que se abona "moi por baixo do que se paga noutros traballos de responsabilidade", non se recoñece, ao seu xuízo, "o labor extraordinario que os facultativos realizan", debido a que, esgrime, "o que se fai en realidade é pagar por un aumento de carga laboral -horas extraordinarias ou sobrecarga de traballo- como en calquera empresa, e non pagar por ese esforzo e dedicación sería ilegal e ata rozaría a escravitude".

MÁIS E MELLORES CONTRATOS

CESM Galicia apunta que "a única solución a este problema" que arrastra a sanidade desde hai anos "é a ampliación dos recursos humanos". "Pero para que os profesionais queden no Sergas e non busquen alternativas na sanidade privada ou noutros países onde son moito máis recoñecidos profesional e economicamente, é necesario incentivalos", insiste.

Para iso, propón "listas pechadas cun tope de pacientes aos que dedicar polo menos 10 minutos por consulta; un recoñecemento profesional que a administración lle ha negado sen motivo algún; unha atractiva remuneración e a posibilidade de conciliar vida laboral e familiar".

"Os médicos non están dispostos a vender a súa saúde nin a dos seus pacientes prolongando a súa xornada laboral, coa sobrecarga de traballo que iso supón e a responsabilidade que se asume ao ter que diagnosticar e tratar con tan escaso tempo aos cidadáns", advirte este sindicato.

Por último, CESM Galicia reprocha á Xunta a "perda de recoñecemento social que sofren os médicos de familia nos últimos anos por medidas adoptadas polo Sergas" durante a pandemia, matiza, "como a extensión da consulta telefónica e a falta de recursos humanos que provocou o incremento das listas de espera para ser atendido de forma presencial".