As sireas de emerxencia de ducias de presas e da balsa de lodos de Alcoa en Cervo soan estes días

Os simulacros forman parte dos plans de emerxencia que debe aprobar a Xunta ante posibles emerxencias.
 

A Xunta comezou este luns a activación de proba das sirenas de aviso á poboación adscritas ás presas do Plan de Emerxencia. Este luns activáronse nove das 32 previstas e o martes continuarase coas restantes e tamén coas sirenas adscritas ao depósito de lodos vermellos procedentes de Alcoa no concello lucense de Xove.

Con esta revisión, a administración autonómica pretende garantir a operatividade dos sistemas e que a poboación das zonas afectadas recoñezan o son da sirena de aviso de evacuación.

Nun comunicado, a Xunta explicou que en Galicia hai actualmente 45 plans de emerxencia de presas aprobados que teñen como obxectivo ter definidas as estratexias para facer fronte a situacións que comporten risco de rotura ou avaría grave, coñecer as zonas que quedarían asolagadas en caso de rotura e ter previstos os sistemas de aviso, tanto á poboación como aos organismos xestores de emerxencias.

Así, buscan estar "o mellor preparados posible para situacións que comporten riscos nestas instalacións e, desta maneira, garantir a seguridade dos cidadáns da contorna".